أدسم وأحلى وأغنى أكلة بدون سعرات حرارية

هي الطبخة أنا اخترعتا ورح تعجكون أكيد بس لحد الآن ما لقيت اسم فبدي منكم تساعدوني
هيي أكلة كتير دسمة وكتير حلوة بس بدون سعرات حرارية مكتسبة نهائيا يعني متل الكولا زيرو
المقادير

01 - 100 غرام رز
02 - 100 غرام حنطة الجافة
03 - 100 غرام زبدة
04 - 100 غرام زيت زيتون
05 - كوب واحد ( تبع شايي ) عسل
06 - 75 غرام شعيرية
07 - 38 غرام فول يابس بدون نقع
08 - 49 غرام بازلاء
09 - نصف كيلو خيار
10 - 246 غرام بندورة
11 - 120 غرام خس
فحلين كريمين بصل وتلت فصوص توم وكمشة نعنع أو جرجير
التوابل
كبش قرنفل - كركم - ملح - فلفل - كمون - كزبرة - زنجبيل - هال - جوزة الطيب - ورق غار
- قشور برتقال - قشور رمان - حزين جبس - نعناع يابس - فليفلة حمرا - ورق زيتون
سكر بني - سكر نبات - سكر أبيض مطحون - ( طبعا أتورة أتورة من كل نوع حسب الرغبة )
وإذا كنت مريش شوي يعني ( ميسور الحال ) فيك تضيف أتوسة ( أقل من الأتورة بشوي )
زعفران لأنو ترى غالي واوا ( لأني بزماناتي كنت بحما وبدي جيب شوية توابل شفت تسعيرة
العصفر 250 ليرة للوقية الواحدة استغليتا كتيييييييييييييييييير فقلتلو لصاحب المحل حطلي شي وقية
زعفران ..... فنط الأخ من محلو وصار رييلو يطلع من تمو ويقول شو شششششووووووووو
بدك وقية زعفران أي أنا ماعندي بكل المحل أقل من نص وقية قلتلو أف وليش انبحتت علينا شو كفرنا
قال لاوالله ما كفرت بس ياخيي غرام الزعفران الي عندي ومن أردأ الأنواع بـ 150 ليرة
فالتزمت الصمت شي نص ساعة وقلتلو عمرو مايتيكل اعطيني ربع وقية عصفر لقلك )
أي ماعلينا منرجع للطبخة وعلى فكرة أنا مجربا وضعفت عليها 29 كيلو
طريقة التحضير

منجيب طنجرة تساع الكل ومنخلطهم كلهم مع بعض على نار هادئة منضيف التوابل وبعد ما بتستوي
منشيل الطنجرة ومتل ماهيي منكبى بحاوية الزبالة وهيك منكون طبخنا أدسم وأحلى وأغنى طبخة
ومنضل جوعانين وما كسبنا بهالحالة ولا حريرة
ملاحظة هامة : أوعى ها أوعى تكبوها قبل ما تستوي
ملاحظة هامة تانية : الأكلة مكلفة والغاية من هالشي أنو الويحد بينحر عليها وهدا الشي بيصرف سعرات
يعني الأكلة بتتصنف من بين حوارق الشحوم

اول ما شفت العنوان لفتني قلت الله يستر شو جايب اليوم ..

على كل حال يسلمو ...بس فيها حرق للوقت وللاعصاب ....

وبالنسبة للاسم بظن خبيصة ..ياريت تقبل مروري

ولو يا رنوشة ما أنا متوقع إنك أول المارين والمستفيدين من إبداعاتي المطبخية

شكرا أخي العزيز كنان ولكن ماهذا لقد أفحمتني
سؤال:بعد مانحطا بالزبالة كيف بدنا ناكلا من الزبالة مباشرة ولا منحطا بصحون؟

وشكرا راح جربا بس إذا ماطلعت طيبة راح دفعك مبلغ التكاليف وشكرا
برأيي أسم للأكلة (كوج مقلوبة بالزبالة)

عراحتك خيي علي أيمد ما بدك تاكل منها كول قبل أو بعد الزبالة مابيهم
بس أنا من ناحيتي ما بدوقها منشان تأدي غرضها
يعني هيي نعملت منشان ما تتيكل بس عراحتك كول اذا بدك .... نيع نيع نيع