تحية إلى سلمية

من طرف فادي علي الأربعاء مايو 12, 2010 3:01 pm

" هني تلات شوارع, شارع حمص, شارع حماه, شارع الثورة"

هكذا عرفني صديقي السلموني على مدينته في أول زيارة لي, وكان كالدليل يسارع إلى تسمية الأماكن وشرح ملخص عن كل منها, لم يعرف حينها أنني لم أكن أصغي إليه, بل كنت أشعر بتلك الخصوصية والدفء اللذين يداعبان أي زائر لسلمية.

في دمشق, كان لقائي بهم (شباب سلمية), ومعهم قضيت أيام الجامعة, أحببت فيهم احترام الاختلاف ونحن في الشرق لم نمتهن بعد هذا الاحترام على الشكل الأمثل.

أحببت فيهم العمق الفكري الذي يحفز إطلاق الأفكار ويترقب عودة أصداء غنية بعيدة عن التكرار الببغاوي وحيد اللون.

أحببت فيهم البساطة, وهي عقدتي مذ رحلت عن قريتي الوادعة في طرطوس, وغصت في محيط دمشق حيث لا حدود للاحتمالات.

وفي إحدى زياراتي لسلمية, رافقني شعور غريب عند العودة, شعور ذكرني بذلك اللهيب الذي يحرق سلامي كلما اتجه الباص نحو الشرق مغادراً بحر مدينتي نحو العاصمة, كان المشهد عادياً, سهول ممتدة من كل حدب وصوب, وصوت فيروز يتردد في باص ( عدره ) المتجه إلى حمص ( ع دروب الهوى مشاني حبيبي . . ), أدركت حينها أن الأمر تم, وأنني وقعت في عشق مدينتكم, لأضيفها إلى وطني الذي امتد من الشريط الغربي الأخضر, إلى دمشق أم الدنيا.

عشق المدن هو الحالة الأرقى من العشق, فالحب حين يعظم عندي يخلط كل أوراقي, وكم من مرة زرعت صدور من أحب, كما يزرعون القمح في قريتي, وعدت لأحصده تماماً كما يفعلون هناك, فالحب وحده يزيد الصدور والتراب خصباً, وكم من مرة اختلط علي الأمر, فبدأت أكتب لمن أحب, وإذ بي أتلمس تفاصيل مدينتي وأصلي لها لتبادلني الحب ولو قليلاً.

سلمية أضافت لي بعداً إنسانياً جديداً, وثقافة جديدة, هي ثقافة السهول الذي أخبرني زيتونها كيف أطلقتم صرخة الحياة من موت الصحراء.

سلمية علمتني كيف أتتبع حروف الماغوط في زواقيق حاراتكم الشعبية الدافئة, كيف تلم الرياح بتلات أزهار اللوز من مزارعكم وتحملها إلى غابة جبل عين الزرقا.

فهذه باقة ورد مقطوفة من جبل قريتي, مشكّلة من كل النباتات والأزهار هناك, مررتها على هواء مدينتي الرطب, لأرميها على سطوحك سلمية, ليكون عشقنا, عناقاً لشرق وطني وغربه.

من طرف **مراد فطوم** الأربعاء مايو 12, 2010 5:45 pm

ينتابنا أحياناً الشك في أن الدنيا لا تمطر صيفاً ...
لكنها أمطرت اليوم بالحب وبالورود ...
ونزلت على كل سطح وبداخل كل قلب من أبناء من بيننا ...
شكرا أخي فادي علي على هذه الكلمات الرائعة والحالة الجميلة اللي ما فيي أوصفها....
والله يخليلك وانت هلق منا وفينا ومن ترانيم فيروز هي منا من سلمية إلك..
لو جيت نهار عابيتي لقيت إنك حبيبي بغيابي جيت
بتشوف إن ما مرقوا إلا إيديك على هالبيت
كإنك حبيبي و أنت عينيك هلق فليت
يا ريتك هون حبيبي و ليل
و يكون نبيد و شمع الليل
و أكتبلك عا ورقة حتى ما قول ما بقدر قول
يا ريتك مش رايح يا ريت بتبقى عطول

تحياتي ...............

من طرف نغم القصير الأربعاء مايو 12, 2010 6:17 pm

يا جارة القمر يا أحلى غنيي
يا جارة القمر موجي بهالسهرية
غناني و ذكر حب و سهر
ليل الهوى سهراتك يا جارة القمر
أولاً أشكرك على هذه الكلمات اللطيفة المفعمة بالأحاسيس الجميلة
ثانياً عندما قرأت كلماتك هذه شعرت أني أبحر في جنة جميلة من الكلمات وقد أوصلت لنا شعورك ضمن كلماتك هذه..
شكرا لك وأهلا بك بيننا ضمن أسرة المنتدى

من طرف رواد قطلبي الأربعاء مايو 12, 2010 8:07 pm

بيقول مارسيل : في البال أغنية
وأنا في ببالي شي مليار غنيّة يافادي من لحظة الي فتحتلك فيها باب البيت بالشام بالمزة لحد ما صرنا اخوة في غنيات لسهرة الأركيلة وفي غنيات لمشوار باب توما وغنيات لطريق الرجعة ع البيت وغنيات وقت التنظيفوغنيات للقراية وغنيات للطبخ وفي غنيات خاصة بطرطوس وغنيات خاصة بسلمية .
بطرطوس ....... آآآآآآآآآآآآآآخ من طرطوس كل مابروح لعندك بتمنى كون طرطوسي ياأخي عندكن سحر موطبيعي وأما الشيخ بدر فهي بدها حكاية طويلة من مدخلا للنويحة لراس الجبل وبيت خالتك ومسيل المي وجوعيت والمريقب والقليعات للمغارة والطريق الزراعي ومشعل الجلاء و ........
وقبل كل هاد لناسا الطيبيين
أنت صحي عشقت سلمية بس ولايوم رح توصل لهيامي فيكن
أهلا أبو الفود .............. اشتقتلك

من طرف **رنوشة** الخميس مايو 13, 2010 5:54 pm

ما بعرف شو قول ما شالله عليك ما خليتلنا شي نقولوا كلماتك اللي بتدل ع صدقك ومحبتك النا

بشكرك ع كل كلمة وكل حرف كتبتو اللي بيحمل بطياتو ريحة البحر وعبق طبيعتكن اللي بتجنن

انا ما بعرف شو قول غير انو هالكلام شرف النا ووسام ع صدورنا منفتخر في والله خجلتنا

والف تحية مني الك صح بعرفك من خلال الحكي والصور بس بتنمى تشرفنا بزيارة ونتعرف عليك أكتر ..

اذا بالمنتدى هيك عملت فينا كيف ع الطبيعة ..؟

و بحب زيد معلومة انو في عنا أربع شوارع ..الثورة – السعن - حمص - حماه

ع كامل احترامي الك .........رانيا

من طرف فادي علي الخميس مايو 13, 2010 6:21 pm

شكراً كتييييييييير
انا بعتز بكلامكم اللطيف الممزوج بصوت فيروز ( وهي أحد نقاط ضعفي )
مراد من يوم باقة الورد الك بقلبي شكر , خجلتني بكلامك الحلو , أنا معجب كتير بنشاطكن وجهدكن لإدارة هالمنتدى الراقي اللي بيعكس شخصياتكن,
شكراً نغم عردك ( العذب ) و حروفك الأنيقة, بتمنى رأيك يكون حقيقي مو مجاملة
رنوشة تحية إلى سلمية Icon_redface

شو بدي قول ؟ ما بعرف!! رح قللك بس انو هي مشاعري الصادقة واني أكيد رح زوركن قريباً بشرط انتو كمان تزوروني بالضيعة وبخصوص الشوارع حقك عليي بس هيك عرفني صديقي السلموني تحية إلى سلمية Icon_biggrin

عكلن هي صار الي حجة روح لعندكن لشوف شارع السعن !!!
شكراً لإحساسكن العالي وذوقكن
رح اقرا الخواطر السابقة كلها شوي شوي
بتمنى لما شارك بشي ما يعجبكن تكونو صريحين وواضحين
أبو الرود الغالي بدل ما تفردلي عواطفك ابعتلي شي طبخة رح موت من الأندومي
ذكرتني بالضيعة, وبإيام اللولو . . بس مشكلة الزمن انو بيعلم بالقلب وما بيرجع لورا!! تحية إلى سلمية Icon_pale